Arti pamor

Veprat e Ibrahim Kodrës prezantohen në Lihtenshtajn

Në fillim të korrikut në Liechtenstein, në njërën ndër galeritë më prestigjioze u hap një ekspozitë me vepra të piktorit Ibrahim Kodra. Ky ishte përkujtim dhe prezantim i veprave që do të tërheqin hapat e jetës artistike të Mjeshtrit Kodra. Ekspozita mbledh së bashku vepra origjinale të Ibrahim Kodrës, i konsideruara si një nga postkubistët e fundit në botë dhe që ka lënë gjurmë të rëndësishme në historinë e pikturës italiane dhe evropiane. Poeti Paul Eluard e përkufizoi veprën e tij si “Primitizmi i një qytetërimi të ri” ndërsa Pablo Picasso deklaroi se “edhe nënshkrimi i tij është një vepër arti”.

Maria Pacolli, drejtoreshë artistike e Fondacionit Zviceran “Ibrahim Kodra”, prezantoi Ibrahim Kodrën si mjeshtër i cili realizoi vepra të shumta në vendet që frekuentonte. Ai pjesën më të madhe të jetës e kaloi në Milano dhe vitet e tij të fundit ai kaloi periudha të gjata pushimesh në Liqenin e Luganos, ku ai sodit bukurinë e tij natyrore, e cila ishte e dukshme në veprën e tij të fundit “Lugano fantastica “(2005). Dashurinë e tij për atdheun e tij mund ta gjejmë në serinë e tij të veprave Albania Fantastica, ku linjat gjeometrike katrore kombinohen me linja të buta të lakuara.

Kjo ekspozitë pati mbështetjen e ministrive të kulturës së Shqipërisë dhe Kosovës si dhe galerive kombëtare të dy vendeve. Kuratorja e kësaj ekspozite dhe drejtuesja e fondacionit Ibrahim Kodra znj.Masha Pacolli, në një Intervistë për televizionin shqiptar Top-Channel Albania, na tregon qëllimin e kësaj ekspozite e cila do te qëndrojë e hapur deri në tetor.

Gazetarja: Zonja Masha, çfarë përfaqëson të çoni Ibrahim Kodrën, piktor shqiptar, në Lichtenstein nga ju, si kuratore dhe drejtuese e fondacionit qe mban emrin e tij, në kohë pandemie?

Znj.Masha Pacolli: Për ne para së gjithash ishte një nder. Ibrahim Kodra është një artist i madh, që gjithmonë ka përçuar origjinën shqiptare në veprat e tij. Ishte krenar për këtë. Kultura nuk ka as kufij e as limite. Flet një gjuhë universale, që s’ka nevojë për përkthime.

Gazetarja: Ju jeni shtetase shqiptare dhe ruse. Çfarë ju ka shtyrë të punoni ne këtë sektor, në ndërmarrje të ndryshme që lidhen me imazhin e shqiptarëve duke përdorur artin dhe kulturën?

Znj.Masha Pacolli: Vjen nga familja ime. Im atë ishte një piktor në Rusi. Ka jetuar në periudhën sovjetike. Pashë që ka një ngjashmëri me Kodrën. Ai gjithmonë ka përçuar lirinë dhe mesazhin e tij artistik paqësor dhe edukativ nëpërmjet veprës. Të jesh shtetase shqiptare dhe ruse, për mua do të thotë të ndihesh qytetare e botës.

Gazetarja: Na shpjegoni pak, si mendoni të bëni realitet testamentin e Ibrahim Kodrës, për formimin e artistëve të rinj shqiptarë?

Znj.Masha Pacolli: Kemi një projekt dhe një ide te zhvillojmë një kamp artistik që përfshin edhe muzeun Ibrahim Kodra dhe te sjellim një pjesë të trashëgimisë së tij edhe këtu në Shqipëri. Për t’ju dhënë mundësinë këtyre artistëve të rinj të mësojnë nga arti i Ibrahim Kodrës, sepse ka shumë filozofi aty. Fondacioni Zviceran Ibrahim Kodra u themelua në Lugano me qëllim të transmetimit të mesazhit artistik të artistit Evropian, Ibrahim Kodra, si një instrument për paqen dhe kulturën, si një fije e përbashkët që lidh popuj të ndryshëm. Në bashkëpunim me institucione në Shqipëri, Kosovë, Itali dhe të tjerë, Fondacioni mbështet dhe zhvillon projekte kulturore, sociale dhe edukative, duke promovuar shkëmbimin kulturor midis Zvicrës dhe vendeve të ndryshme të botës. Falë bujarisë së donatorëve të saj, Fondacioni mbështet projekte të shumta kulturo-arsimore.

You Might Also Like