Drita ka humbur ndaj Ballkanit me rezultat 2:3 dhe nuk ia doli që për herë të parë këtë vit të dal në pozitën e parë.
E trimëruar nga ndeshjet e fundit në Superligën e Kosovës dhe në Europa Conference League, FC Drita ishte futur në ndeshje me Ballkanin, me të cilin kishte pikë të barabarta në pozitat 2 dhe 3, duke synuar ta zinte Prishtinën, e cila dje bëri një lëshim të madh.
Ballkani u fut në ndeshje tejet i motivuar dhe e nisi më mirë, duke e mbajtur topin më shumë në pronësi dhe duke qenë më i rrezikshëm.
Pas një pasigurie në mbrojtjen e Dritës, në minutën e 12-të, Kryeziu e shërbeu Tolajn, i cili me një gjuajtje të saktë nga rreth 20 metra qëlloi këndin e epërm të majtë të portierit Maloku, duke shënuar për 0:1.
Në minutën e 24-t, Olemba Ouvuka nga thellësia e shërbeu Kristal Abazajn, i cili, në stilin e një qendërsulmuesi të rryer, me këmbën e djathtë dhe pjesën e brendshme e goditi aq saktë topin sa e dërgoi në këndin e epërm të majtë të Ilazit, duke barazuar në 1:1.
Në minutën e 32-të, Pëllumbi bëri një gabim trashanik kur u përpoq t’i shërbente Ben Zidanit, dhe këtë e shfrytëzoi Giovani Ribeiro, i cili me qetësi e dërgoi topin në këndin e poshtëm të Malokut për 1:2. Drita sapo u nis nga mesi i fushës dhe sërish ra tërësisht vija e fundit e saj, gjë që e shfrytëzoi Valid Hamidi, i cili qëlloi këndin e djathtë të poshtëm të Faton Malokut për 1:3.
Pas një harkimi nga këndi që e dha Ajzeraj, topi erdhi te Pëllumbi, i cili goditi me kokë, por topi për pak doli jashtë pingules së djathtë të Ilazit.
Drita ia ka dalë të ngushtojë epërsinë e Ballkanit në 2”3 në minutën 57, kur pas harkimit të Ajzerajt nga gjuajtja nga këndi, e kokë kërceu Ovouka që e zgjati topin deri te Abazaj e ky me të parën me volej gjuajti dhe qëlloi këndin e poshtëm të majtë të Ilazit.
Në minutën 88 pas kartonit të dytë të verdhë nga loja është përjashtuar Geralb Smajli i Ballkanit. Përkundër se pati një lojtar më shumë në fushë dhe pesë minuta lojë shtesë, Drita nuk ia doli të shënojë edhe një herë dhe ndeshja përfundoi me rezultat 2:3. /Kryelajmi.com/.
