“Floil” dhe prodhuesit tjerë, janë brendi e krenaria e Gjilanit, Anamoravës dhe e Kosovës
Në mbrojtje të prodhuesve vendorë pas problemeve të mëdha me energji që pëlcitën kohëve të fundit, bashkë me nënkryetaren e LDK-së, Hykmete Bajrami, e cila udhëheq politikat e partisë karshi prodhuesve, kandidatin tonë për kryetar të Komunës së Gjilanit, Arbër Ismajli, deputetin Krenar Xhaferi, kryetarin e Vitisë, Sokol Haliti dhe kryetarët e degëve të LDK-së në Anamoravë, Jeton Biqkaj (Kamenicë), Bajrush Ymeri (Novobërdë) dhe Përparim Rexha (Kllokot), vizituam fabrikën e vajit “Floil” një ndërmarrje model që me punë, cilësi dhe vizion e ka kthyer prodhimin vendor në krenari kombëtare.
Në një kohë të krizës së thellë energjetike, të shkaktuar nga vendimet e papërgjegjshme të Qeverisë Kurti, që kanë sjellë rritje drastike të tarifave të rrymës, mungesë të mbështetjes për sektorin privat dhe një klimë të pasigurt për investime, LDK mbetet e përkushtuar në mbrojtje të biznesit vendor dhe fuqizimin e prodhuesve tanë.
Bizneset janë aset i yni strategjik. Ato nuk janë thjesht vende pune, janë garanci për zhvillim, eksport, qëndrueshmëri ekonomike dhe pavarësi energjetike e ushqimore. Floil është shembull frymëzues se çfarë mund të arrihet me punë të ndershme, inovacion dhe përkushtim.
LDK do të vazhdojë të jetë zëri i sipërmarrësve, partner i prodhuesve dhe garantues i një qeverisje që e vendos zhvillimin ekonomik dhe punësimin në qendër të agjendës.
Kosova ka nevojë për më shumë kompani si FLOIL. Ka nevojë për politika të mençura dhe mbështetje reale për prodhimin vendas.
