Gjilan, 28 janar 2019 – Shfaqja “I ligu për mend” e autorit Gjergj Fishta me regji të Altin Bashës e ku luajtën aktorët e Tetarit Kombëtar të Kosovës është përzgjedhur si shfaqja më e mirë në Festivalin e Dramës Kombëtare “Talia e Flakës 2019”.
Juria vlerësuese e Festivalit ka ndarë edhe çmimet e tjera, që tradicionalisht jepen në këtë Festival, kurse e veçantë kësaj radhe ishte çmimi që e ndau drejtori i Teatrit të Gjilanit, Erson Zymberi për vepër jetësore e karrierë aktorit të mirënjohur gjilanas, Jashar Shahiqi.
Në këtë Festival u dha edhe çmimi special, i cili i ka takuar aktores së re Vanesa Petrovci, çmimi i parë për aktoren më të mirë i ka takuar Ilire Vincës, aktori më i mirë u vlerësua Luan Jaha, drama më origjinale ishte ajo e Enver Petrovcit.
Me mirënjohje janë nderuar të gjitha trupat pjesëmarrëse të teatrove.
Shpresa Kurteshi – Emini, kryetare e Bordit të Manifestimit “Flaka e Janarit”, ka përcjellë përshëndetje dhe mirënjohje për të gjithë ata që u angazhuan në Festival, i cili doli tejet i realizuar.
Ajo ka shprehur falënderim për përkrahje edhe për kryetarin e Komunës së Gjilanit, Lutfi Haziri dhe drejtorin e Teatrit, Erson Zymberi. Kurteshi – Emini ka shtuar se sivjet “Flaka e Janarit” i kushtohet 20-vjetorit të çlirimit të Kosovës.
Para dhënies së çmimeve është dhënë shfaqja “Kur hana del” e Teatrit “Adriana” të Ferizajt, me autor Ag Apolloni e me regji të Ben Apollonit.
Në të luajtën Ali Krasniqi, Edona Berisha-Bekteshi, Vjosa Abazi, Dashuri Rexhepi, Jajush Ramadani, Arben Marevci, Sherif Bega, Mevlan Saraçi, Gresa Gashi, Ekrem Jakupi. Skenografia e shfaqjes është bërë nga Lebibe Topalli, kostumografia nga Pranvera Sylejmani, ndërsa muzika nga Shaban Ratkoceri.
Ngjarja në këtë shfaqje lidhet me kontekstin historik të luftës në Kosovë dhe me shpalljen e Pavarësisë.
Në të paraqitet përfundimi i luftës së fundit në Kosovë dhe fati tragjik i personazheve, derisa nëtë vite më pas edhe periudha në prag dhe pas shpalljes së Pavarësisë së Kosovës dhe fundi tragjik i Hanës, nuses që humbi burrin në luftë. Fatin e Hanës dhe të personazheve që u paraqitën në këtë shfaqje e kishin edhe shumë familje të tjera kosovare.
