Komuna e Vitisë, ka shpërndarë sot 71 freza bujqësore me madhësi 1.80 cm për fermerët përfitues të kësaj komune, në kuadër të mbështetjes për zhvillimin e bujqësisë dhe lehtësimin e punës së fermerëve.
Në ceremoninë e dorëzimit morën pjesë kryetari i komunës, Sokol Haliti, dhe drejtori për Bujqësi, Pylltari dhe Zhvillim Rural, Naim Pira, të cilët theksuan përkushtimin e komunës për të përkrahur vazhdimisht fermerët vitias.
Kryetari Haliti tha se ai dhe komuna e Vitisë, gjithnjë janë krenuar me fermerët e saj punëtorë të cilët sipas tij kanë produkte të mira bujqësore si brende që janë të njohura në gjithë Kosovën. Ai theksoi se kjo komunë ndryshe njihet edhe si hambarë i Anamoravës, duke bërë me dije se komuna që ai udhëheq po vazhdon furnizimin e fermerëve përfitues me paisje të ndryshëm bujqësore. Sipas tij vetëm në këtë fazë deri me tani janë ndihmuar mbi 200 fermerë vitias.
Kurse drejtori i Bujqësisë, Naim Pira bëri me dije se vlera e përgjithshme e këtij projekti është rreth 57 mijë euro, ku 20% e vlerës është participim nga vetë fermerët përfitues, ndërsa pjesa tjetër është e mbuluar nga buxheti i komunës së Vitisë.
Zyrtarët komunal bënë të ditur se mbështetja për fermerët do të vazhdojë edhe në të ardhmen, në përputhje me nevojat e tyre për mekanizëm bujqësor dhe pajisje të tjera për kultivimin e tokës.
