Në mëngjesin e së shtunës është mbajtur edhe seanca e fundit stërvitore në përgatitje për duelin e fundjavës ndaj FC Prishtinës në shtëpi.

• Redi Kasa nuk ia ka dalur të tejkalojë lëndimin e pësuar në seancat stërvitore
• Shqiprim Taipi vazhdon të stërvitet i diferencuar nga pjesa tjetër e skuadrës
• Edison Kqiku dhe Haris Isufi do të jenë jashtë fushës gjithashtu për shkak të lëndimit
• Tefik Ramadani do të jetë risia e listës së të ftuarve
• Dueli ndërmjet Gjilanit dhe Prishtinës do jetë i 37-ti në elitën e futbollit kosovar pas luftës

Ballafaqimi ndërmjet Gjilanit dhe Prishtinë do jetë dueli kryesor i xhiros së tretë në elitën e futbollit kosovar. Dy skuadrat me traditë në futbollin kosovar do të përballen ndërmjet tyre këtë të diel (31 gusht) në stadiumin ndihmës në Gjilan nga ora 16:30.

Kryetrajneri i skuadrës, Ardian Nuhiu do jetë me dhimbje koke për këtë takim, pasi që grupi nuk është i kompletuar me mungesat e Redi Kasas, Shqiprim Taipit, Edison Kqikut dhe Haris Isufit.

Megjithatë, atmosfera ka qenë në nivel te “kuqebardhët” gjatë gjithë javës, pavarësisht nisjes jo të mirë të kampionatit. Në përballje me kryeqytetasit “Skifterat” synojnë të nisin ecurinë e rezultateve pozitive.

Pas kësaj ndeshje ekipi shkon në pushimin e kombëtareve, për t’u rikthyer me ndeshje pas dy javëve.