Një mbrëmje e mbushur me emocione, nostalgji dhe respekt për artin u zhvillua mbrëmë në Teatrin e Gjilanit, ku doajeni i muzikës popullore, Remzi Leka, festoi 40-vjetorin e karrierës së tij muzikore.
Gjatë koncertit jubilar, Remzi Leka interpretoi disa nga këngët e tij më të njohura, të cilat ndër vite kanë shënuar sukses të madh në radio dhe televizione, duke ngjallur emocione të forta dhe nostalgji tek publiku. Një nga hitet më të paharrueshme, “Pse nuk erdhe sonte në Gjilan”, u prit me duartrokitje të gjata dhe emocion të veçantë.
Krijimtaria e Remzi Lekës ka lënë gjurmë të thella në muzikën popullore shqiptare, duke u bërë pjesë e identitetit kulturor të qytetit të Gjilanit dhe të gjithë Anamoravës. Me përkushtim, autenticitet dhe dashuri për muzikën, ai ka ndërtuar një opus të çmuar që ka kaluar brez pas brezi.
Edhe pas 40 vitesh në skenë, Remzi Leka vazhdon të gëzojë respekt të madh nga publiku dhe kolegët, duke dëshmuar se arti i vërtetë nuk njeh kohë dhe se muzika e mirë mbetet gjithmonë aktuale.
Një mbrëmje fenomenale, një karrierë e jashtëzakonshme dhe një emër që do të mbetet përgjithmonë në historinë e muzikës popullore shqiptare./Radio Star/
