Në orët e hershme të mëngjesit, një prishje në rrjetin e ujësjellësit ka shkaktuar përmbytje në lagjet “Halim Orana” dhe “Ibrahim Pacolli”. Si pasojë e defektit në disa gypa të ujit, një sasi e madhe uji ka vërshuar rrugët dhe ka depërtuar në shtëpi e lokale të ndryshme në këtë pjesë të qytetit.
Banorët janë shprehur të shqetësuar nga situata, duke thënë se uji ka hyrë në ambientet e brendshme dhe ka shkaktuar dëme materiale.
Ekipet e mirëmbajtjes së ujësjellësit janë njoftuar menjëherë pas raportimeve të para nga banorët dhe, sipas burimeve lokale, punimet për sanimin e defektit kanë nisur në orët e para të ditës.
Ndërkohë, banorët e lagjeve “Halim Orana” dhe “Ibrahim Pacolli” kanë apeluar për ndërhyrje më të shpejtë dhe për kontroll më të rregullt të rrjetit të ujësjellësit, për të shmangur raste të ngjashme në të ardhmen.
