Kryelajmi, 12 nëntor 2024 – Gjilan,
Në një ngjarje të paharrueshme, në Universitetin Publik “Kadri Zeka” në Gjilan, në sallën B01, u promovua libri “Përafërsisht” i autorit Avni Rudakut, një vepër që trajton disa nga temat më të rëndësishme të kohës sonë, duke përfshirë ndikimin e skrollokracisë, rolin e teknologjisë në shoqëri dhe përshkrimin e ndikimeve të saj në fushat e edukimit, letërsisë dhe shkencës.
Në këtë promovim të veçantë, për herë të parë në Kosovë i këtij lloji, u përdor një element inovator dhe futuristik: video AI, ku një interpretim digjital i tekstit të librit u shoqërua me personazhe dhe karaktere të krijuara nga inteligjenca artificiale. Kjo eksperiencë e re u shoqërua me një mesazh të fuqishëm mbi ndikimin e teknologjisë në mënyrën si ne perceptojmë dhe konsumojmë informacionin, si dhe për pasojat e mundshme që ka përdorimi i skrollit dhe i teknologjisë në përpjekjen tonë për të kuptuar dhe ruajtur njohuritë.
Në fjalimin e tij, autori Rudaku ndau me të pranishmit refleksionet mbi skrollokracinë, një term që ai e përdor për të përshkruar sundimin e skrollit (ose lëvizjen e ekranit me gishta) dhe mënyrën se si kjo ka ndikuar në lexueshmërinë dhe aftësinë e individëve për të shpërqendruar vëmendjen në të gjitha zhanret e shkrimit në botë. Rudaku diskutoi gjithashtu se si mund të ndryshojnë proceset e të mësuarit dhe të lexuarit për shkak të ndikimit të vazhdueshëm të teknologjisë në jetën e përditshme.
“Përafërsisht” është një vepër që hedh dritë mbi këto tema, duke përfshirë një analizë të thellë të marrëdhënies ndërmjet teknologjisë dhe zhvillimit të shoqërisë, përveç një shqyrtimi të aspekteve të tjera kulturore dhe shoqërore që lidhen ngushtë me ndikimin e teknologjisë në literaturë dhe shkencë.
Redaktimi i librit ishte realizuar nga Selim Daku, një emër i njohur në fushën e edukimit universitar, i cili theksoi përmes një videoregjistrimi, se libri i Rudakut, trajton dilemat e të tashmes dhe të ardhmes së teknologjisë së avancuar në jetën tonë të përditshme dhe në çdo fushë. “Rudaku në libër jo vetëm krijon emocion me tekstin e tij, por jep një analizë të detajuar, shumë të hollësishme mbi efektet e teknologjisë në shoqërinë bashkëkohore” – vazhdoi Daku.
Promovimi i librit, i mbështetur nga Ministria e Kulturës, Rinisë dhe Sporteve (MKRS), pas suksesit në aplikimin në thirrjen publike për mbështetjen e autorit 2024, u bë edhe më i veçantë me ndihmën e dizajnerit të kopertinës, Migjen Fazliut, i cili krijoi një pamje vizuale që pasqyronte thelbin e librit dhe temat që Rudaku trajton, duke e përshkruar kalin me skroll, në analogji me praktikën e dikurshme që ia mbyllnin sytë kalit, për të mos parë majtas ose djathtas, por vetëm përpara, ngjashëm me njeriun e sotëm që nuk sheh asgjë përtej skrollit disaorësh çdo ditë në rrjetet sociale, duke mbizotëruar kalimi sekondësh nga një imazh në imazhin tjetër, nga një video e shkurtër në tjetrën, duke humbur sensin e leximit tradicional dhe multizhanret e shkrimit. Libri u realizua nga shtëpia botuese Lena Grafik në Prishtinë.
Një veçori e promovimit ishte fakti se ngjarja u zhvillua në një format që bashkonte tradicionalen dhe modernen, duke përdorur teknologjinë për të sjellë një mesazh të fuqishëm për lexuesit e rinj dhe ata të moshuar. Në fund të video-s AI që ilustronte pasazhe nga libri, vetëm autori Avni Rudaku doli në skenë për të përmbyllur ngjarjen me një fjalë të thjeshtë, por të fuqishme. Ky moment shenjoi lidhjen e drejtpërdrejtë midis botës virtuale dhe asaj reale, një simbol i përpjekjes për të ruajtur kontaktin me thelbin njerëzor edhe në një epokë ku teknologjia po ndryshon përditshmërinë tonë.
Libri “Përafërsisht” është një thirrje për reflektim mbi rrezikun e humbjes së aftësisë për të lexuar dhe përvetësuar informacion në mënyrë të thellë, për shkak të shpërqendrimit që sjell përdorimi i pajisjeve digjitale. Një thirrje për të mbajtur një balancë mes teknologjisë dhe ruajtjes së vlerave kulturore dhe intelektuale që kanë ndihmuar në zhvillimin e shoqërisë njerëzore për mijëra vjet.
Në këtë mënyrë, promovimi i librit “Përafërsisht” nuk ishte vetëm një ngjarje e librit të ri e të pestë të Rudakut, por një reflektim i thellë mbi mënyrën se si teknologjia dhe libri mund të bashkëjetojnë dhe të ndikojnë në njëri-tjetrin në botën e sotme të skrollokracisë, imazhokracisë dhe videokracisë – sundimit të skrollit, imazhit dhe videove të shkurtra.
