Futboll

Te Gjilani s’ka kush të shënojë

Ka krijuar një mal rastesh, por SC Gjilani në fund është dashur të kënaqet me një pikë të fituar në ballafaqim me Drenicën, në ndeshjen e luajtur këtë të enjte në Skenderaj.

Me sulmuesit e lënduar, Gjilani ka mbetur keq në fazën e sulmit, kurse një gol në katër ndeshje edhe atë i shënuar nga i lënduari Nikaq, është tepër pak për një ekip që pretendon sërish daljen në Evropë.

Në pjesën e parë Drenica nuk e pati asnjë gjaujtje në portën e Gjilanit, kurse mysafirët patën rast të mirë nëpërmjet Kurtajt, i cili nga një pozitë shumë e mirë gjuajti në duart e portierit Ymeri.

Në pjesëlojën e parë ishte edhe një rast kontestues, kur për Gjilanin u dha një penalti, por që më pas gjyqtari ndërroi mendje, gjë e cila u vërejt edhe në incizimet televizive, ngase penaltia ishte e paqenë.

Pjesëloja e dytë dha edhe më shumë raste për Gjilanin, por që sulmuesit e saj u treguan të ngathtë.

Në minutën 58, rast të mirë pati Hila, por priti Ymeri i Drenicës. Ymeri priti edhe gjuajtjen e Fiton Hajdarit, kurse në minutën 80, si kundër Ballkanit edhe kundër Drenicës, përforcimi në sulm Shend Kelmendi nga një pozitë e pastër gjuan jashtë portës. Rasti i fundit për Gjilanin ishte në minutën 84, por gjuajtjen e dënimit të Prognit për mrekulli e priti Ymeri dhe rrjetat mbetën të patundura.

You Might Also Like