Këshilli i Qendrës së Lëvizjes VETËVENDOSJE! në Gjilan konfirmon fuqishëm mbështetjen për kandidaturën e Kryetarit të Qendrës, njëherit Kryetar i Komunës, Alban Hyseni për të vazhduar mandatin e dytë në udhëheqje të Gjilanit.
Në mbledhjen e Këshillit sot, delegatët votuan listën e fitores së 12 tetorit, për përfaqësuesit e Lëvizjes VETËVENDOSJE! në Kuvendin Komunal.
Lista jonë përfaqeson vlera me njerëz të shquar të komunës sonë, profesionistë të dalluar në fushat e tyre, të cilët përfaqësimin me dinjitet kanë detyrë, ndërsa mirëqenia qytetare dhe zhvillimi i gjithëmbarshëm janë synimi ynë parësor.
Vazhdojmë bashkë me qytetarët edhe katër vite tjera pune dhe progresi për Gjilanin.
Alban HYseni ka theksuar:
Jam thellësisht i nderuar dhe mirënjohës për përkrahjen e plotë të të gjitha strukturave të Lëvizjes VETËVENDOSJE!, nga Kryeministri Albin Kurti e deri te secili aktivist e anëtar, që u kurorëzua sonte me votim të Këshillit të Qendrës së Lëvizjes në Gjilan për të më konfirmuar zyrtarisht si kandidat për Kryetar të Gjilanit.
Vazhdojmë bashkë edhe katër vite të tjera pune e përkushtim për Gjilanin që duam.
