Me fillimin e sezonit të ri vjeshtor, Teatri i Qytetit të Gjilanit rikthehet me një repertor të pasur shfaqjesh tona dhe mysafire, si edhe me pjesëmarrje në disa festivale të rëndësishme teatrore në vend.
Nga datat 2 deri më 30 shtator, publiku do të ketë mundësinë të ndjekë një program intensiv me mbi 15 shfaqje, që përfshijnë drama bashkëkohore, tekste të fuqishme evropiane, si dhe krijime origjinale vendore. Ky diversitet e bën shtatorin një muaj të veçantë për të gjithë dashamirësit e teatrit, duke e shndërruar Teatrin e Qytetit të Gjilanit në një qendër të gjallë të kulturës dhe artit skenik.
Shfaqje mysafire dhe pjesëmarrje në festivale
Programi i shtatorit është i pasuruar edhe me shfaqje mysafire nga teatro të tjerë, si “Unë jam vetë grua” nga Teatri INTEGRA, “Prishtina – Vrasje e paralajmëruar e një ëndrre” nga Qendra Multimedia si dhe “Detektivi dhe nana” nga Teatri Andrra.
Një pjesë e repertorit merr pjesë gjithashtu në festivale të rëndësishme kombëtare si në Ferizaj, Suharekë dhe Mitrovicë.
Ky prezantim i programit është një ftesë e hapur për publikun: rikthim në sallë, takim me aktorët dhe magjinë e teatrit, në një sezon që do t’sjellë emocione dhe përvoja të paharrueshme.
