Lidhja Demokratike e Kosovës ka shpallur zyrtarisht Arbër Ismajlin kandidat për kryetar të Komunës së Gjilanit në zgjedhjet e 12 tetorit. Me një karrierë të gjatë politike, një trashëgimi të fuqishme familjare dhe përvojë të dëshmuar në fushën e biznesit, Ismajli shihet si një ndër figurat më të forta dhe më premtuese për udhëheqjen e qytetit.
Arbër Ismajli, 44 vjeç, vjen nga një familje gjilanase me traditë të thellë në arsim dhe patriotizëm. Të dy prindërit e tij, profesorët Ruzhdi dhe Zizë Ismajli, gjithë jetën u kujdesen për edukimin e brezave të rinj. Profesori Ruzhdi, që u nda nga jeta në vitin 2006, njihet për kontributin e tij historik gjatë viteve të okupimit serb, kur hapi shkollën e Mjekësisë “Asllan Elezi”, duke arsimuar me qindra nxënës nga Gjilani, Kamenica, Viti dhe Lugina e Preshevës. Ai ishte po ashtu ndër themeluesit e LDK-së në Gjilan.
Nëna e Arbërit, profesoresha Zizë Ismajli, dha një kontribut të jashtëzakonshëm në gjimnazin “Zenel Hajdini”, ku për dekada me radhë edukoi gjenerata të tëra nxënësish.
Gjyshi i Arbërit, Shukri Ismajli, ishte një luftëtar i pathyeshëm për çështjen kombëtare, i burgosur dhe i torturuar disa herë nga regjimi serb, por që kurrë nuk u përkul. Ai mori pjesë në luftën e Kikës dhe për tri vite ishte shef i sigurisë në Aeroportin e Rinasit në vitet ’40.
Arbër Ismajli është i lidhur me Lidhjen Demokratike të Kosovës që nga mosha 17-vjeçare. Ai u rrit me frymën e Ibrahim Rugovës, duke e parë politikën si shërbim për qytetarin dhe kombin. Në vitet e hershme u bë nënkryetar i Forumit Rinor të LDK-së, duke treguar aftësi të mëdha organizative dhe lidershipi.
Në karrierën e tij ka mbajtur edhe pozita të rëndësishme në qeverisjen lokale, përfshirë atë të shefit të kabinetit të kryetarit të Komunës Lutfi Haziri. Më vonë, si nënkryetar i Komunës së Gjilanit, la gjurmë të pashlyeshme sidomos gjatë kohës së pandemisë COVID-19.
Kur qyteti dhe e gjithë bota po përballeshin me një armik të padukshëm, Ismajli u dallua për menaxhim të jashtëzakonshëm. Ai qëndroi pranë qytetarëve ditë e natë, duke koordinuar ndihma dhe duke marrë vendime të guximshme për të mbrojtur shëndetin publik. Për këtë angazhim, qytetarët e nderuan me botimin e dy librave që përshkruajnë punën e tij të palodhur gjatë asaj periudhe.
Përveç politikës, Arbër Ismajli njihet edhe si afarist i suksesshëm. Ai ka menaxhuar me sukses biznesin e tij privat, duke dëshmuar aftësi të spikatura menaxheriale dhe vizion zhvillimor. Eksperienca e tij në sektorin privat shihet si garanci se ai di të menaxhojë me profesionalizëm edhe qeverisjen lokale, duke i dhënë Gjilanit një frymë të re zhvillimi ekonomik.
I njohur si politikan modern, Arbër Ismajli thekson katër shtylla themelore të vizionit të tij: drejtësi, zhvillim, solidaritet dhe sinqeritet. Ai beson fuqishëm se qytetarët e Gjilanit nuk duan autokraci, por një qeverisje demokratike, transparente dhe me standarde evropiane.
Modestia e tij është dëshmuar edhe në raste konkrete. Kur komisioni për emërtimin e rrugëve nga Komuna e Gjilanit, kërkuan që një rrugë e qytetit të mbante emrin e të atit të tij, profesor Ruzhdi Ismajli, Arbri refuzoi, duke thënë se nuk dëshironte që kontributi i prindit të tij të shihej si përfitim personal nga pozita publike.
Sot, si kandidat i LDK-së për kryetar të Komunës së Gjilanit, Arbër Ismajli paraqet një kombinim të përvojës politike prej gati tri dekadash, traditës së fortë familjare, profesionalizmit në arsim dhe suksesit në biznes.
