Gjilan, 20 mars 2020 – Nënkryetari i Komunës së Gjilanit, Arbër Ismajli, në emër të kryetarit Lutfi Haziri, ka pritur në takim mobilizimi të gjithë furrtarët e kësaj komune dhe është konfirmuar se qytetarët do të kenë furnizim të vazhdueshëm me prodhimet e furrave të Gjilanit dhe nuk ka hapësirë për t’u shqetësuar për bukën e gojës.
“Qëllimi i këtij takimi ka qenë që të marrim kërkesat dhe nevojat e furrtarëve për furnizim me miell. Kemi hequr dilemat e mungesës së miellit, duke u bazuar në kontaktet zyrtare që kemi me operatorët ekonomik. Në bazë të kërkesave që kanë potencuar furrtarët, operatorët ekonomik, do t’i furnizojnë furrtarët me miell. Bashkërisht me furrtarët, komunitetin e biznesit dhe qytetarët do ta tejkalojmë këtë gjendje. Nuk ka vend për shqetësim nga ana e qytetarëve, sepse të gjitha furrat e Gjilanit janë në punë të vazhdueshme”, ka thënë Ismajli, njofton kumtesa komunale.
Më tej, ai ka bërë të ditur se Komuna e Gjilanit përmes Komisionit të saj, ka krijuar edhe rezerva shtesë në rastet emergjente.
“Jemi në kontakt me kryetarët e Këshillave lokalë, gjatë ditës së sotme do të bëhet ndarja e pakove ushqimore në bazë të vlerësimit të komisionit nga vizitat në terren. Deri më tani Gjilani është ruajtur nga Zoti, është vepruar me kujdes maksimal nga qytetarët që i falënderojmë shumë, ndërsa kërkojmë vigjilencë dhe kujdes edhe më tutje sepse deri më tani nuk kemi asnjë rast dhe kështu së bashku mund ta kalojmë këtë sfidë”, ka thënë mes tjerash ai.
Nga ana e saj, drejtoresha e Zhvillimit Ekonomik, Valbona Tahiri, ka potencuar se lëmitë e ndryshme biznesore që kanë të drejtë të punojnë dhe kushtet të cilat ata duhet t’i respektojnë gjatë ushtrimit të veprimtarisë së tyre.
Kurse Maliq Kosumi, në emër të furrtarëve, ka falënderuar Komunën e Gjilanit për mbështetjen mëse të nevojshme në këtë kohë emergjente që vendi po kalon.
“Jemi duke punuar vazhdimisht sikur edhe ditët tjera para këtij virusi. Të gjitha furrat e bukës me mbështetjen e konfirmuar nga Komuna e Gjilanit tashmë garantojnë që do të ketë prodhim të mjaftueshëm të bukës për një kohë të gjatë. Me këtë veprim, Gjilani po garanton qytetarin e vet dhe duke u bazuar në këtë nuk ka vend për shqetësim, sepse kur stoqet e furrtarëve të jenë të garantuara edhe furnizimi, por edhe çmimet do të jenë stabile sikur edhe më parë”, ka potencuar Kosumi.
