Me rastin e përfundimit me sukses të programit “Këshilltar për Karrierë” të nivelit të V-të për gjeneratën e pestë dhe të gjashtë, u mbajt ceremonia solemne e shpërndarjes së certifikatave, e organizuar nga Agjencia për Arsim dhe Aftësim Profesional dhe Arsim për të Rritur (AAAPARr), aktivitet ky në të cilin mori pjesë zëvendësministri i Arsimit, Shkencës, Teknologjisë dhe Inovacionit, Taulant Kelmendi.
Ky program synon zhvillimin e aftësive profesionale dhe përgatitjen për të ndihmuar individët në orientimin e tyre në karrierë, duke ofruar mbështetje dhe këshilla për zgjedhjet dhe zhvillimin profesional.
Në fjalën e tij, zv/ministri, Taulant Kelmendi theksoi se roli i këshilltarëve të karrierës është jetik, veçanërisht në një kohë kur të rinjtë përballen me zgjedhje të shumta dhe sfida të ndryshme në zhvillimin e tyre profesional dhe akademik.
“Duke qenë ura lidhëse, këta profesionistë luajnë një rol kyç në orientimin e të rinjve drejt vendimeve më të mira për të ardhmen e tyre, duke nxitur suksesin dhe vetë realizimin”, tha ndër të tjera zv/ministri Kelmendi.
Kelmendi tuje theksoi rëndësinë e bashkëpunimit dhe përkushtimit të të gjithë akterëve në ndërtimin e një sistemi arsimor që i përgatit nxënësit dhe të rinjtë për sukses në jetë dhe karrierë, dhe se të arriturat dhe sukseset e përmendura jo vetëm që pasqyrojnë rëndësinë e këtij programi, por edhe ndikimin pozitiv që ka në përmirësimin e mundësive për të rinjtë.
Ndërsa, drejtoresha e Agjencisë për Arsim dhe Aftësim Profesional dhe Arsim për të Rritur, Fikrije Zymberi theksoi se gjatë periudhës tri vjeçare janë arritur që të jenë 89 Këshilltar të Karrierës të cilët kanë potencial që të ndihmojnë të rinjtë dhe profesionistët të ndërtojnë karrierën e tyre.
