Në mesin e shumë talenteve të shkollës fillore “Musa Zajmi” në Gjilan, një emër që shkëlqen veçanërisht është ai i nxënëses së klasës së nëntë, Bora Devaja. E dalluar në shumë fusha, Bora është një vlerë e vërtetë e kësaj shkolle, jo vetëm për sukseset e saj akademike, por edhe për angazhimin dhe përkushtimin ndaj bashkëmoshatarëve.
Përveçse është një nxënëse shembullore me rezultate të shkëlqyera në mësime, Bora mban edhe pozitën e Kryetares së Parlamentit të Nxënësve, ku me zë të qartë përfaqëson interesat e bashkëmoshatarëve të saj para udhëheqësisë shkollore. Ajo është gjithmonë aktive në nisma që ndihmojnë zhvillimin e jetës shkollore dhe promovojnë pjesëmarrjen e nxënësve në vendimmarrje.
Talenti i Borës nuk ndalet me kaq. Ajo është një sportiste e zellshme dhe luan me përkushtim në ekipin e basketbollit, duke treguar aftësi të larta fizike dhe shpirt gare. Po aq e veçantë është edhe në fushën e shkrimit – artikujt e saj editorialë, të botuar në revistën e shkollës, janë vlerësuar lart nga mësimdhënësit për përmbajtjen, rrjedhshmërinë dhe ndjenjën e thellë që përcjellin.
Në shkrimin e saj të fundit në revistën e shkollës, me shumë ndjenja dhe nostalgji, 14-vjeçarja ka rrëfyer përvojën e saj shumëvjeçare në këtë institucion, duke e përshkruar si vendin që i ka dhënë energji, dije dhe përgatitje për jetën. Ajo thekson se çdo aktivitet – nga garat e diturisë, aktivitetet sportive, projektet kreative e deri te debatet – ka qenë një mundësi për të mësuar dhe për të kontribuar.
“Shkolla ‘Musa Zajmi’ për mua është dhe do të mbetet gjithmonë një vend i rëndësishëm që më ndihmon të zhvillohem si individ. E vlerësoj çdo ditë që kam kaluar aty me buzëqeshje, përkushtim dhe shumë kujtime që do t’i mbaj gjatë gjithë jetës,” ka shkruar Bora me shumë ndjenja.
Tani që vetëm pak javë e ndajnë nga përfundimi i klasës së nëntë, ndarja me këtë shkollë e emocionon thellë. Ajo do të ndahet nga bankat ku mësoi shkronjat e para, nga mësimdhënësit që e mbështetën në çdo hap dhe nga shokët e shoqet me të cilët ndau plot kujtime gjatë nëntë viteve të para të arsimit.
Një vajzë si Bora Devaja për qytetin e Gjilanit dhe gjithë Kosovën është një aset i rrallë i intelektit dhe pasionit rinor. Talente të tilla duhet përkrahur dhe vlerësuar, sepse përfaqësojnë shpresën dhe të ardhmen e ndritur të vendit tonë.
