Pas një pune dyzetvjeçare në arsim, këtë të enjte ka mbërritur moshën e pensionimit Fatmir Latifaj, drejtor në Shkollën e Mesme të Ultë ”Mulla Idris Gjilani” në Velekincë. Në këtë ditë të veçantë, në këtë shkollë është organizuar një ceremoni përcjellëse, ku kanë marrë pjesë kolektivi i shkollës dhe mysafirë të shumtë, të cilët kanë çmuar lart punën e mësimdhënësit dhe drejtorit Fatmir Latifaj, shkruan kryelajmi.com
Në këtë ngjarje ka marrë pjesë edhe Albana Demiri, drejtoreshë e Arsimit në Gjilan, e cila ka çmuar lart punën e drejtorit Fatmir Latifaj dhe organizimin e kësaj ngjarje. Ajo tha se me drejtorin kanë patur bashkëpunim të shkëlqyeshëm. Atë e ka cilësuar drejtor shembull. “Ai ka dhënë kontribute për këto vite dhe ai do të ngelet model i një drejtori të mirëfilltë”, tha drejtoresha Demiri, duke e cilësuar Latifajn mësimdhënës dhe udhërrëfyes të përkushtuar dhe se ai nuk do të ndalet as në vitet e pensionimit dhe se ai do të jap kontribut edhe të mëtejmë.
Naile Aliu, mësimdhënëse, është paraqitur me një fjalë rasti dhe ajo ka falënderuar drejtorin për tërë kontributin që ka dhënë. Në emër të fshatit ka folur profesori Skënder Bajrami, i cili ka uruar ditëlindjen dhe pensionimin e drejtorit, për të cilin tha se në këtë shkollë ai punoi në vite me radhë si mësimdhënës e si drejtor, duke arritur suksese të mëdha. “Sot nuk po largoheni nga kjo shkollë. Ju merrni falënderimet e zemrat tona”, tha Bajrami dhe ka nderuar me mirënjohje drejtorin e pensionuar në emër të fshatit.
Me këtë rast, drejtori Fatmir Latifaj i është drejtuar komunitetit dhe prindërve të fshatit Velekincë, ku e ka selinë shkolla, sikurse që i është drejtuar edhe anëtarëve të kolektivit dhe nxënësve, të cilët i ka cilësuar familje të dytë dhe i ka falënderuar për këtë përgatitje që i është bërë, kurse nuk ka lënë pa përmendur edhe miqtë dhe familjarët. Ai tha se ndjehet i emocionuar nga fjalët që ka dëgjuar nga drejtoresha e Arsimit, Albana Demiri, por edhe nga komuniteti i fshatit. Ai ka thënë se të gjitha sukseset e arritura i ndanë me të gjithë, ngase pa mbështetjen dhe kontributin e secilit ato nuk do të arriheshin. Ai ka dëshiruar që në këtë shkollë të rritet cilësia edhe më shumë./kryelajmi.com/.
