SC Gjilani që po zhvillon fazën përgatitore në Antalya në Turqi, është ballafaquar këtë të enjte me ekipin nga Kazakistani, Elimai, në ndeshjen që është luajtur në kompleksin Calista.
Golashënues për SC Gjilanin ka qenë qendërsulmuesi shtatlartë Senad Jaroviq, në minutën 40, derisa edhe kazakët kanë shënuar një gol për t’u mbyllur ndeshja me rezultat të barabartë 1:1.
Të rikujtojmë se kjo ndeshje ishte dashur të zhvillohet të mërkurën, por shkaku i shirave të dendur në bregdetin turk, ndeshja ishte shtyrë për një ditë më vonë./kryelajmi.com/.
Raporti nga faqja zyrtare e SC Gjilani
Është mbyllur me rezultatin e barabartë dueli miqësor përballë skuadrës Elimai nga Kazakistani (1-1).
Fraksioni i parë i ndeshjes u mbyll me epërsinë minimale të “kuqebardhëve” pas golit të realizuar në fundin e pjesës së parë nga sulmuesi Senad Jarovic.
Ndeshja nisi me ritëm dhe raste për shënim nga të besuarit e Ardian Nuhiut, teksa mundësi shënimi u treguan për Edi Basan, Oltion Bilallin dhe Senad Jarovic.
Megjithatë, goli erdhi tek në fundin e pjesës së parë, pas një aksioni model të nisur nga vetë Jarovic përmes Edi Basa, Armend Thaqit dhe Kushtrim Shabanit, ky i fundit asistoi për sulmuesin boshnjak, i cili e dërgoi topin me lehtësi drejt rrjetës (0-1).
Në pjesën e dytë të lojës, stafi provoi gjithë futbollistët duke ndryshuar gjithë përbërjen, teksa u dhanë minuta edhe për të rinjtë e skuadrës.
Blerind Morina kishte mundësi ideale për të shënuar, teksa goditi shtyllën pingule në minutën e 70-të të ndeshjes. Paraprakisht, dy minuta më parë ‘gardiani’ Rrezon Matoshi bëri një intervenim fantastik duke shpëtuar skuadrën pas një mundësie të mirë shënimi për skuadrën kazake.
Deri në fundin e ndeshjes ekipi humbi përqendrimin dhe tetë minuta para se të mbyllej takimi pësuan gol, me rezultatin i cili mbeti final deri në fund (1-1).
Kjo ishte miqësorja e dytë në tokën turke për skuadrën e Gjilanit, derisa edhe dy të tjera janë në program më datat 25 dhe 28.
