Shkruan: Arben Zeqiri
Durimi nuk do të thotë të mos ndjesh dhimbje. Përkundrazi, do të thotë ta ndjesh dhimbjen, ta përjetosh padrejtësinë, por të mos lejosh që ato të të shndërrojnë në një njeri që nuk je.
Durimi është të heshtësh kur fjalët e tua mund të lëndojnë.
Është të mos hakmerresh kur të bëjnë padrejtësi.
Është të ruash karakterin dhe dinjitetin tënd edhe atëherë kur mirësia jote nuk vlerësohet.
Durimi nuk është dobësi. Është forcë.
Është një betejë e heshtur me veten, ku shpesh fitorja më e madhe është të mos bëhesh i ngjashëm me ata që të kanë lënduar.
Prandaj, mos u bëj i keq vetëm sepse dikush të ka bërë keq. Mos e humb dritën tënde për shkak të errësirës së dikujt tjetër.
Dhe mbi të gjitha, mëso të falësh. Jo sepse ajo që të kanë bërë ishte e drejtë, por sepse zemra jote meriton të jetë e lirë nga urrejtja.
Falja nuk do të thotë të harrosh, as të lejosh dikë të të lëndojë përsëri. Mund të falësh dhe njëkohësisht të vendosësh kufij. Mund të largohesh pa urrejtje, të heshtësh pa dobësi dhe të ecësh përpara pa kërkuar hakmarrje.
Disa gjëra ia lëmë kohës, ndërgjegjes së njerëzve dhe drejtësisë së Krijuesit. Sepse jo çdo padrejtësi kërkon një përgjigje nga ne. Ka drejtësi që nuk kemi nevojë ta kërkojmë me duart tona.
Besoj se Krijuesi nuk e humb asnjëherë nga sytë dhimbjen e atij që duron, zemrën e atij që fal dhe mirësinë e atij që, edhe pasi është lënduar, zgjedh të mos lëndojë.
Në fund, rëndësi nuk ka vetëm çfarë na bënë të tjerët kur patën mundësi të na lëndonin. Rëndësi ka kush zgjodhëm të mbetemi ne, pavarësisht dhimbjes që na shkaktuan.
Fitorja e vërtetë nuk është t’ia kthesh tjetrit dhembjen që të shkaktoi, por të dalësh nga zjarri i saj me dinjitetin ende të paprekur, me shpirtin të pahelmuar dhe me dritën brenda vetes ende të ndezur.
Të durosh pa u përkulur, të falësh pa u nënshtruar dhe të largohesh pa e marrë urrejtjen me vete, kjo është madhështia e vërtetë e karakterit njerëzor.
Ky shkrim i imi u frymëzua nga një mësim i lashtë mbi durimin: se shpërblimi i atij që di të durojë nuk ka masë. Por, përtej çdo besimi, kjo është një e vërtetë universale e jetës: durimi na mëson të mos thyhemi nga ajo që na lëndon, të mos bëhemi si ata që na kanë bërë keq dhe të vazhdojmë përpara në jetë me dinjitet, zemër të pastër dhe besim te e mira.
#classicfashion 👔🥇
