Kryetari Alban Hyseni në debat me qytetarë: Synimi ynë i parë ka qenë që të rrisim besimin e qytetarëve në institucione
Gjilan, 27 qershor / Kryetari i Komunës së Gjilanit, Alban Hyseni ka mbajtur sot takimin e parë publik për këtë vit, ku ka prezantuar punën e gjashtëmujorit të parë, sukseset dhe sfidat e kësaj periudhe si dhe ka bashkëbiseduar me qytetarët përmes pyetje-përgjigjeve.
Pasi ka folur për gjetjet dhe gjendjen në të cilën ai e ka marrë mandatin e që kanë qenë pengesë për fillimin e qeverisjes, kryetari Hyseni është ndalur të punët e realizuara në këtë gjashtëmujor, ose që do të kryhen brenda këtij viti, në bashkëpunim me qeverinë përkatësisht ministritë përkatëse, me donatorë ose nga buxheti i Komunës.
‘Synimi ynë i parë ka qenë që të rrisim besimin e qytetarëve në institucione’ ka thënë kryetari Hyseni.
Fushata për një ambient të pastër, është njëri prej aktiviteteve që ne e kemi fort për zemër, për shkak se duam një qytet ndryshe, duam një Gjilan që ia ka lakmi secili qytet në Kosovë dhe për këtë jemi duke punuar fort edhe në fushën e menaxhimit e të riciklimit të mbeturinave dhe çështje të tjera që lidhen me mjedisin e pastër.
Në dy shkolla po punohet në programin e efiçiencës së energjisë, me çka do të krijohen kushte më të mira për mësim dhe aktivitete, pasi që në shumicën e shkollave tona sistemi i ngrohjes është i vjetër.
Këtë vit do të ndërtohen dy çerdhe në Gjilan në Miresh dhe lagjen ‘Qarku 1’, ndërsa jemi zotuar se brenda mandatit tonë do t`i ndërtojmë katër sosh dhe po aq kopshte.
Po ashtu jemi duke punuar në studimin e fizibilitetit dhe analiza për ngrohjen qendrore të qytetit, projekt ky që do të financohet nga BERZH-i dhe Banka Evropiane për Investime.
Në administratë, po punohet në digjitalizimin e arkivit, ndërkohë që është vendosur edhe orari i punës së pandërprerë, për t`iu ofruar qytetarëve shërbime të mira e të shpejta.
Është bërë digjitalizimi i bibliotekës së qytetit dhe kjo nënkupton se po ecim drejt krijimit të bibliotekës së parë elektronike në Kosovë.
Kryetari Hyseni ka folur edhe për investimet dhe planet në infrastrukturë rrugore, ujësjellës, kanalizime e ndriçim publik, në shëndetësi, bujqësi, kulturë, rini, sport e sektorë të tjerë.
Me buxhetin e Komunës, sivjet do të realizohen projekte në vlerë mbi 1.2 milionë euro, sikurse një numër projektesh do të realizohen me ministritë përkatëse në Livoç të Poshtëm dhe Livoç të Epërm, shtatë terrene sportive në qytet dhe shkollat e fshatrave, asfaltimi i rrugëve në fshatin Cërnicë, Haxhaj, parku i lagjes Baja, që do të jetë një nga parqet më të mëdha në komunën e Gjilanit si dhe një mori projektesh tjera nëpër lagje e vendbanimet tona.
‘Po ashtu jemi duke realizuar projekte që kanë për qëllim përfshirjen e qytetarëve, qoftë në planifikim, qoftë në vendimmarrje për gjëra që kanë të bëjnë me interesin e përgjithshëm’, ka thënë ai.
Kryetari Hyseni ka folur edhe për Planin Zhvillimor Komunal, i cili është anuluar, për shkak se, siç tha nuk ka ai, nuk ka qenë edhe aq zhvillimor dhe një prej problemeve kryesore ka qenë zona ekonomike, e cila ka qenë e planifikuar në një hapësirë, ku vetëm 18 nga 100 hektarë janë pronë komunale.
Ne kemi vendosur që zonën ekonomike ta zhvendosim në një hapësirë edhe më të madhe dhe ku prona është komunale dhe nuk ka nevojë për shpronësim.
Po ashtu, kryetari Hyseni ka prezantuar veç e veç punën dhe angazhimet e secilës drejtori, njësi e zyrë komunale, të dhëna këto që do të publikohen të plota në faqen e komunës.
Kryetari Hyseni, bashkë me drejtorët, në vazhdim është përgjigjur në pyetjet dhe interesimet e qytetarëve.
