Botime të reja
POETJA ZANË MALI VJEN ME LIBRIN E SAJ TË PARË, “KUR DIELLI LIND NË BEBËZA”
Pikërisht në Ditën e lirisë së shtypit, e cila koincidon dhe me ditëlindjen e heroit të kombit, Agim Ramadanit, 3 Majin, poetja e re Zanë Mali, sjell për lexuesit dhe bibliotekat tona, librin e saj të parë poetik, KUR DIELLI LIND NË BEBËZA, të cilin e botoi përmes Shtëpisë botuese “Beqir Musliu”, nën përkujdesjen redaktoriale të prof dr. Anton Nikë Berisha.
Libri i parë poetik i kësaj juristeje të re të Kosovës, ndërtohet përmes dy cikleve , të cilat i lidhë nga fillimi e deri në fund ndjenja më sublime e njeriut, dashuria.
Në ciklin e parë, “Stina që më mori në prehër”, gjejnë vend 36 poezi, ndërsa në ciklin e dytë, “Shtegëtime nëpër rreze drite”, 30 të tjera, të cilat bashkërisht shpalosin përmes artit të fjalës një botë tejet të pasur poetike e dashurore, të cilën autorja e re, e paraqet ndjeshëm dhe me figuracion të pasur, pa farë ngurrimi, po me një çiltërsi të pashoqe.
Përndryshe, Zanë Mali, nga viti 2016 e këndej është anëtare e asociacionit alternativ të shkrimtarëve të Kosovës, me seli në Gjilan, Ars Clubi “Beqir Musliu” .
