Pasi e falënderoi për vizitën, kryetari Haziri tha se vizita e senatorit Bockel shënon një nisje për bashkëpunim në kuadër të zhvillimit ekonomik lokal.
“Faleminderit për ardhjen në Gjilan dhe për krejt atë besim të qytetarëve të Luterbach nga Strasburgu, që prej vitit 2000, për qytetin tonë. Shoqata MAN po vazhdon të kontribuojë për zhvillimin e gjuhës frënge dhe bashkëpunim mes rinisë së dy qyteteve. Vizita e sotme e senatorit Bockel, shënon interesimin për një bashkëpunim dhe zhvillim më të madh lokal ekonomik, ku përmes sjelljes së investitorëve dhe shkëmbimit, do të mundohemi t’i arrijmë qëllimet tona”, ka deklaruar Haziri.
Ndërsa, ish ministri i Mbrotjes së Republikës së Francës, senatori Jean-Marie Bockel, tha se po e vizitojnë këtë komunë për ta favorizuar partneritetin ekonomik mes Alsace dhe Gjilanit
“Kemi ardhur me idenë për ta favorizuar partneritetin ekonomik të investitorëve në mes të qytetit të Alsace dhe Gjilanit, e ndoshta edhe me partnerë financiar ndërkombëtar. Lidhur me këto arsye, ne kemi dashur që të njihemi më mirë. Ne dëshirojmë që qyteti i juaj të zhvillohet në vazhdimësi sepse keni mjaftueshëm potenciale. Shteti i Kosovës ka qytetarë të motivuar dhe kushte të mira për investime në infrastrukturë”, ka thënë senatori Jean-Marie Bockel.
Gjatë javëve në vazhdim janë dakorduar që kreu i Gjilanit të realizojë një vizitë në Francë, për konkretizim të bashkëpunimit në aspektin ekonomik.
Ndryshe, shoqërues i senatorit Jean-Marie Bockel, ka qenë edhe gjilanasi Hajrush Azemi, cili tash e 20 vjet jeton dhe vepron në Francë.
