Mbrëmjen e 28 korrikut 2026, në Galerinë e Arteve Gjilan, u hap me sukses edicioni i katërt i ekspozitës kolektive “EKZISTENCA 4”, një ngjarje artistike që vazhdon të krijojë një hapësirë të rëndësishme për dialog, reflektim dhe prezantimin e praktikave bashkëkohore në art.
E kuruar nga Juksel Gjinolli – Sylejmani, ekspozita sjell së bashku tetë artistë me qasje dhe gjuhë të ndryshme krijuese: Avdi Hajdari-Kame, Burbuqe Osmani Jaha, Driton Hajredini, Eshref Berisha, Florim Hasani, Kushtrim Sylejmani, Shuk Orani dhe Visar Kryeziu. Përmes veprave të tyre, artistët trajtojnë tema që lidhen me ekzistencën, identitetin, kujtesën, kohën dhe raportin e njeriut me realitetin, duke i ftuar vizitorët në reflektim dhe interpretime të ndryshme.
“EKZISTENCA 4” nuk ofron përgjigje përfundimtare, por krijon një platformë të hapur ku arti bëhet mjet komunikimi, dialogu dhe shkëmbimi idesh, duke dëshmuar pasurinë dhe shumëllojshmërinë e skenës sonë artistike.
Falënderojmë kuratoren, artistët pjesëmarrës, mysafirët, mediat dhe të gjithë dashamirët e artit që morën pjesë në ceremoninë e hapjes dhe kontribuuan në suksesin e kësaj mbrëmjeje.
Ekspozita mbetet e hapur për vizitorët në Galerinë e Arteve Gjilan.
