Ardian Nuhiu ka bërë thirrje nga dhoma e shtypit para gazetarëve që të jenë me këmbë në tokë dhe të ketë përqendrim dhe vlerësim maksimal për ndeshjen e radhës ndaj Ferizajt.
Kryetrajneri i skuadrës është i vetëdishëm për rëndësinë e pikëve nga ky takim dhe kërkon nga futbollistët që të ketë angazhim maksimal dhe këmbëngulësi.
“Na pret një përballje e vështirë ndaj një ekipi që u ka shkaktuar shumë problemeve thuajse gjitha skuadrave në këtë edicion. Ata mbrohen mirë si grup dhe sulmojnë si grup. Ne kemi përgatitur ndeshjen për t’u ballafaquar me një kundërshtar të tillë. Kërkoj që në këtë përballje të futemi me vlerësim, përqendrim maksimal dhe këmbëngulësi për ta fituar këtë takim”.
Motivimi?!
“Do ta shohim ndeshjen e nesërme. Gjithë lojtarët e dijnë rëndësinë se çfarë do të thotë të fitosh një ndeshje derbi. Ne duhet të shkojmë dhe të tregojmë nesër që kjo fitore nuk ishte e rastësishme. Brenda skuadrës ka kualitet për ta fituar çdo kundërshtar dhe këtë e treguam edhe njëherë ndeshjen e kaluar. Besoj fuqishëm që do të kemi çasje super serioze dhe fitorja e kaluar të jetë një shtytje për të vazhduar ecurinë pozitive edhe në ndeshjen e radhës”.
Rikthimi i skuadrës në ndeshjet e fundit?!
“Ne kemi besuar. Futbollistët kanë besuar. Shoh vazhdimisht ekipin që është duke u përmirësuar. Shoh duke ardhur stabiliteti në skuadër. Koha të cilën po e kalojmë bashkë në procesin stërvitor ka bërë që futbollistët të njihen edhe më shumë me njëri tjetrin. Kjo më bën të besoj që do të përmisohemi edhe më tepër, pasi që do të kalojmë edhe një fazë tjetër së bashku. Ky ekip do të rritet edhe më shumë”.
Udhëtimet e vështira në Ferizaj?
“Kemi punuar me ekipin në aspektin fizik dhe psikologjik. Jemi më këmbë në tokë, pasi që jemi të vetëdishëm se sa të rëndësishme janë këto pikë. Ferizaj u ka shkaktuar shumë probleme ekipeve të tjera dhe për këtë jemi në dijeni. Do jetë mjaftueshëm e vështirë, por kam besim që do të bëjmë një ndeshje të mirë dhe të marrim maksimumin e pikëve”.
Mungesat?
“Kemi mungesa të mjaftueshme, por kemi futbollist të cilët janë të gatshëm për të dhënë maksimumin e tyre, pasi që kanë qenë gjithmonë me ne dhe janë përgatitur si gjithë të tjerët. Shpresoj që do ta dëshmojnë në këtë ndeshje se meritojnë të luajnë”.
Objektivat e gjysmësezonit?!
“Nëse shohim renditjen e pikëve në klasifikim mund të them që nuk jam i kënaqur, por nëse shohim për mënyrën se si kemi luajtur, si jemi zhvilluar dhe jemi rritur si ekip pa dyshim se jam i kënaqur edhe pse kërkoj shumë më tepër. Do të shohim në afatin kalimtar të janarit nëse do të kemi fatin të gjejmë një apo dy koka cilësore që do të na ndihmonin ta shtojmë konkurencën”.
Ndeshja ndaj Ferizajt do të zhvillohet në fushën sintetike prapa palestrës “Bill Clinton” në Ferizaj dhe fillon nga ora 13:00.
