Kandidati për kryeministër i koalicionit AAK, Nisma, Lista Konservatore dhe Forumi Intelektual E-30, Ramush Haradinaj, ka takuar sot strukturat e Aleancës së Gruas nga Gjilani dhe Kamenica, në vazhdën e mobilizimit për zgjedhjet e 9 shkurtit.
Haradinaj ka thënë se barazia gjinore nuk është vetëm çështje e të drejtave, por domosdoshmëri për zhvillimin ekonomik dhe shoqëror të vendit tonë.
“Në takim me strukturat e Aleancës së Gruas nga Gjilani dhe Kamenica, ndava vizionin tonë për fuqizimin e gruas në shoqërinë kosovare. Barazia gjinore nuk është vetëm çështje e të drejtave, por domosdoshmëri për zhvillimin ekonomik dhe shoqëror të vendit tonë. Me programin tonë, gratë do të kenë mbështetje konkrete: 1500 euro për fëmijën e parë, 2500 për të dytin dhe 3500 për të tretin, pagë minimale 500 euro për nënat me 3 e më shumë fëmijë, garanca shtetërore për bizneset e udhëhequra nga gratë. Arsimi profesional do të harmonizohet me tregun e punës, duke hapur perspektiva të reja për vajzat dhe gratë”, ka thënë Haradinaj.
Haradinaj ka shtuar se kandidatët nga Gjilani dhe Kamenica, do të jenë zëri i qytetarëve në Kuvendin e Kosovës.
“Kandidatët tanë nga Gjilani dhe Kamenica, Zarife Asllani, Greta Kryeziu, Ahmet Isufi, Nazim Gagica, Faton Jakupi dhe Kushtrim Xhemaili, do të jenë zëri juaj në Kuvendin e Kosovës për të realizuar këtë vizion. Kosova fiton kur gratë fuqizohen”, është shprehur Haradinaj.
