JONIDA SHEHOLLI
AROMË JETE
Në prag pranvere…
Në pranverën e jetës aromën shijoj
Tek hedh hapa frymëzimi në poezi
Petalet e luleve me shikim ledhatoj
Dhe bredhë në freskinë e stinës rini
Me këngët e shpirtit përkëdhelem
Që muzat me bujari m’i dhurojnë
Nga zëra bilbilash mahnitur ngelem
Kur në cicërima maj blirit ia thonë
Pëshpërimat e shpirtit dëgjohen
Në parkun me lule plot ngjyra
Edhe telat e zemrës drithërohen
Si hëna lozonjare më shndrit fytyra
Si flutur laroshe freskohem n’pikëvesë
Që mëngjesi dhuron në agimet e dritës
Ngrohtësinë e dashurisë në qepallë e pres
Ta shijoj me ëndje sikur ardhjen e ditës
Pranvera gonxhe erëkëndshme në përqafim
E ndriçon shpirtin me rrezet e arta
Me sytë sikur yje plot shkëlqim
Si imazh i diellit në universet e larta!…
14 mars 2021
