Muzikë

“Fest Flaka 2023” dëshmi e begatisë së kulturës sonë 

Gjilan, 30 janar 2023 – Këngëtarë nga të gjitha trevat shqiptare kanë marrë pjesë në Festivalin e Këngëve Popullore “Fest Flaka”, i cili tradicionalisht mbahet në Gjilan në kuadër të Manifestimit Shumëkulturor “Flaka e Janarit”. Festivali ka nisur me “Këngë për Flakën e Janarit”, të autorit gjilanas Demir Krasniqi, mësimdhënës e krijues i shumë këngëve e më pas me këngën “Mashallah bukurisë sate”, është paraqitur fituesja e edicionit të kaluar të këtij festivali, Lumturie Shabani, e cila gjithashtu ishte fituese e shumë festivaleve të muzikës popullore si “Kosovarja këndon 2022” si dhe e shumë çmimeve viteve të fundit.
Ky ishte edicioni i 32-të me radhë i “Flakës së Janarit” e me këtë edhe i “Fest Flakës”, i cili është organizuar nën përkujdesjen e kryetarit të komunës së Gjilanit, Alban Hyseni. Manifestimi mëton të nderojë dëshmorët dhe të rënët për liri përmes trajtimit të vlerave të qëndrueshme artistike.
Ky edicion i “Fest Flakës” është garues, kurse në të morën pjesë edhe shumë artistë nga trevat e ndryshme shqiptare. Në konkurrencë, në këtë festival ishin 15 këngë garuese, të cilat janë vlerësuar nga juria profesionale në përbërje: Zekë Jusufi, profesor i muzikës, Fitore Osmani, profesoreshë e muzikës dhe  Artan Bakija, këngëtar.
Muzika popullore shqiptare përbënë një ndër pasuritë më të çmuara të vendit tonë, andaj shumë këngëtarë për vite me radhë me zërin dhe kontributin e tyre kanë ruajtur begatinë e kulturës sonë kombëtare, andaj festivalin e mbështeti komuna e Gjilanit, zyra e kryetarit e komunës së Gjilanit, Drejtoria për Kulturë, Rini e Sporte, që udhëhiqet nga drejtori Kushtrim Zeqiri, Bordi Organizativ, Orkestra Profesioniste të Gjilanit, Ansamblit “Gjilani” dhe Shtëpisa së Modës “Menakon”, e cila është përkujdesur që artistët të shkëlqejnë në skenë.
Në këtë festival u interpretuan këto këngë: Blend Ibrahimi – “Të kam dashtë dhe të dua”, Blerta Curri – “Po filloj me t’u ankue”, Ermal Demiri – “Kaçurrelat e tu”, Yllka Dema – “Unë biri i yt Kosovë”, Gëzim Hajdari – “Udhët e mia”, Lejla Nika dhe Lorita Mehmeti – “Një lule”, Arlind Demiri – “M’i ke buzët si qershi”, Urata Gashi – “Të deshta me hakikat”, Joni lekaj – “Po i bjen era retë e zeza”, Berat Demiri dhe Donika Kobani – “Jemi ilira jemi teuta” (këngë kjo e orkestruar nga profesori Qazim Azizi), Anesa Bunjaku – “Kroi i fshatit tonë”, Arbër Maliqi – “Këngë bashkimi”, Greta Azizi – “Rrisim jetën tonë”, Mesut Bajrami – “Vajzë me kaçurrela”, Rina Kurteshi – “Albulena”.
Garuesit ishin pothuajse nga të gjitha trevat shqiptare, nga Maqedonia e Veriut, Presheva, Mitrovica, Deçani, Vushtrria, Skenderaj, Vitia, Kamenica dhe Gjilani.
Në cilësinë e mysafirëve janë paraqitur këngëtarja gjilanase Elona
Sadiku, që është fituese e shumë festivaleve kombëtare dhe ndërkombëtare, e cila me zërin e saj të jashtëzakonshëm ka kënduar këngën “Jam bandill” si dhe ish-fituesi i “Fest Flakës” dhe këngëtari i njohur Farush Azemi, që ka kënduar këngën “Këngë për Rexhep Malën dhe Nuhi Berishën”.
Për organizimin e “Fest Flaka 2023” u përkujdesën: Nehat Ferati, menagjer i projektit, Murat Ismajli, përgjegjës artistik, Burhan Azizi, aranzhimet dhe orkestrimet, Bekim Rexhepaj, selektor programi, Albunita Kadriu, moderatore, Art FaBe, skenografia, DJ Albani, zërimi dhe ndriçimi, Besim Baftiu, mjeshtër toni dhe Shtëpia e Modës “Menakon”.
“Flaka e Janarit 2023” vazhdon me artin letrar, në të cilin do të mbahet Ora e Madhe Letrare “Pena e Flakës”, kurse të gjithë fituesit do të shpallen në Gala Mbrëmjen që do të mbahet në fund të këtij edicioni të “Flakës…”.

You Might Also Like