Gjilan, 15 gusht 2021 – Komuna e Gjilanit ka shënuar rritjen më të madhe ndonjëherë të të hyrave vetanake në kodin e Tatimit në Pronë, falë ardhjes masive të mërgimtarëve dhe lojalitetit të tyre për të kryer obligimet shtetrore në vendlindjen e tyre.
Kryetari i Komunës së Gjilanit, Lutfi Haziri, gjatë analizimit të të hyrave në bazë të shifrave zyrtare që disponon Drejtoria e Financave në Gjilan, ka theksuar se ka rritje të inkasimit në kategorinë e Tatimit në Pronë, që fatbardhsisht sipas tij edhe qytetarët e Gjilanit, por në masë të jashtëzakonshme iu kanë përgjigjur pagesave mërgimtarët tanë.
“Përkundër që një vit më parë gjilanasët për shkak të pandemisë mbetën pa u takuar me familjarët e tyre në mërgatë, ata këtë vit kanë ardhur me plotë të mira. Në këtë rrafsh përfituese është edhe Komuna e Gjilanit, në kodin buxhetor të Tatimit në Pronë, ku kemi të hyra për 217 për qind më shumë se në gjashtë mujorin e vitit 2020 dhe të hyrat më të mëdha të shënuara ndonjëherë deri më sot kur analizohen edhe dy muajt e sezonit të verës. Deri më tani është realizuar planifikimi në të hyra nga Tatimi në Pronë mbi 74 për qind dhe mbi 63 për qind nga të hyrat e përgjithshme”, ka thënë kryetari Haziri.
Ai më tej ka falënderuar të gjithë mërgimtarët që këtë vit kanë ardhur në vendlindje, duke u dëshiruar atyre pushime të mira në Kosovë dhe njëkohësisht ka uruar fat, shëndet dhe suksese pas kthimit në vendin ku ata janë duke punuar dhe jetuar me familjet e tyre.
“Një falënderim i veçantë për të gjithë ata që kanë ardhur këtë vit në Gjilan. Janë heronj të gjallë, sepse me kontributin e tyre për një periudhë të shkurtër bëjnë të mundur që të ketë qarkullim të madh në të gjitha sferat e jetës, pavarësisht se në cilën veprimtari. Komuna e Gjilanit gjithmonë do t’i pres në mënyrën më të mirë të mundshme, sepse ata vijnë në shtëpinë dhe familjet e tyre. Ata me kursimet e tyre investojnë në të gjitha format në vendlindje dhe kështu rrisin të gjithë parametrat e zhvillimit”, ka thënë mes tjerash kryetari Haziri.
