Futboll

Nuhiu: Ky ekip është një familje, reflektimi pjesë e karakterit

Ardian Nuhiu është paraqitur para mediave në vigjilje të duelit kampional ndaj Ferizajt, të cilën skuadra ‘kuqebardh’ e zhvillon këtë vikend në shtëpi.

Duke e konsideruar si tejet të rëndësishme këtë sfidë, tekniku i gjilanasve është shprehur optimist që grupi do të tregojë karakter duke reaguar këtë ndeshje.

“Ndodhemi para një takimi të rëndësishëm ndaj një skuadre e cila vërtet lufton shumë, vrapon shumë dhe organizohet shpejtë në sulm. Kjo ndeshje do vlerësim dhe përqendrim maksimal. Kam besim të madh që skuadra ime do të tregoj karakter të fortë sepse e dijmë që po vijmë pas një ndeshje të humbur, por e kemi dëshmuar edhe gjatë vitit se kemi ditur të reagojmë dhe të reflektojmë pas situatave të vështira që kemi patur dhe kjo më bën të besoj fuqishëm te grupi, sepse kualitetin e kemi brenda”.

Duke bërë një rezyme nga dueli i shkuar kampional, Nuhiu beson që skuadra tashmë e ka lënë prapa si histori dhe do të përqendrohet maksimalisht që të nis ecurinë e rezultateve pozitive.

“Ndeshja e kaluar nuk përcakton kualitetin e ekipit tonë dhe as individëve tanë. Po të luajmë edhe shumë ndeshje të tjera nuk do të përsëritet ajo ndeshje. Nga kjo ndeshje kam mësuar që kjo skuadër është një familje. Kemi ndjerë mbështetjen maksimale, sikurse nga drejtuesit, ashtu edhe nga tifozët. Kemi parë dhimbje te futbollistët të cilët mezi po e presin ndeshjen e nesërme për ta lënë prapa të kaluarën. Përballë kemi një tjetër sfidë të rëndësishme për të cilën duhet të bashkohemi dhe të reagojmë për të marrë maksimumin dhe të shohim përpara”.

Nuhiu ka folur edhe për objektivin final të skuadrës, për të cilën ka thënë se do të luftojnë në secilën ndeshje që të marrin maksimumin e pikëve.

“Kemi përpara shumë pikë në lojë, janë gjithsej edhe dhjetë ndeshje për të treguar kapacitetin tonë, pasi që ndeshjet e kaluara nuk mund ti kthejmë prapa. Kualitetin e kemi për të reaguar dhe gjithë këtu brenda ekipit që jemi si një familje besojmë fuqishëm që do të arrijmë objektivin tonë. Numërimin do ta bëjmë në fund të kampionatit dhe jo tani”.

Stafi teknik do të ketë gjithë grupin e futbollistëve në dispozicion për duelin e së shtunës.

“Grupi është i kompletuar. Gjithë futbollistët janë në dispozicion dhe të gatshëm për të dhënë maksimumin nga ndeshja e nesërme”.

Ballafaqimi ndërmjet Gjilanit dhe Ferizajt fillon nga ora 15:00.

You Might Also Like