Gjilan, 28 gusht 2019 – Kryetari i Komunës së Gjilanit, Lutfi Haziri, së bashku me zëvendësministrin e Infrastrukturës, Rexhep Kadriu, kanë vizituar punimet në projektin e ndërtimit të rrugës kryesore të Cernicës, i cili është në përfundim e sipër, në gjatësi prej 3 kilometrash dhe me kosto prej 300 mijë euro.
“Jemi në fazën e përfundimit të kësaj rruge, por edhe problemeve të tjera që i ka kjo rrugë. Po punojmë edhe në drejtim të Livoçit në ndërtim të rrugës së dytë dalëse dhe hyrëse për Cernicën. Pjesa e ndriçimit të kësaj rruge do të vazhdohet në vitin e ardhshëm. Poashtu, do të vazhdojmë me ndërtimin e shtratit të lumit. Është në grupin e fshatrave model në kuptimin që po shkon në drejtim të përmbylljes së programeve infrastrukturore. Me z. Kadriu si ish-nënkryetar kemi filluar shumë herët t’i programojmë këto projekte dhe e falënderoj për mbështetjen në nivel qeveritar”, ka thënë kryetari Lutfi Haziri.
Haziri tha se do të vazhdojnë të punojnë në ndërtimin e rrjetit të ujësjellësit në Vrapqiq, sikurse edhe në realizimin e projekteve të vogla në Gumnishtën e Poshtme dhe të Epërme.
Ndërkaq, zëvendësministri i Infrastrukturës, Rexhep Kadriu, ka thënë se është i lumtur që po përfundon ky projekt jashtëzakonisht i rëndësishëm për këtë pjesë.
“E falënderoj kryetarin Haziri për bashkëpunimin dhe implementimin e të gjitha projekteve të përbashkëta të nivelit qendror, të cilat janë duke u financuar në komunën e Gjilanit”, tha Kadriu.
