Gjilan, 17 shtator 2020 – Kryetari i Komunës së Gjilanit, Lutfi Haziri, i shoqëruar nga drejtori për Shërbime Publike, Naser Korça, ka vizituar të enjten vendbanimet e brezit kufitar, duke përfunduar vizitën tek fermeri Kadri Bajrami, në fshatin Stançiq.
Kreu i Gjilanit theksoi se banorët e Malësisë së Karadakut janë heronjtë kufirit atje, derisa i ka konfirmuar këtij fermeri zhvillimin e projekteve infrastrukturore në këtë fshat të brezit kufitar.
“Vizitova vendbanimet në Malësinë e Karadakut dhe në fund qëndrova tek heronjtë e kufirit, siç është kryefamiljari Kadri Bajrami, një fermer i zoti. Stançiqi dhe Gryka e Karadakut deri tek Maja e Zezë, është kthyer në zonë turizmi, zhvillimit të blegtorisë dhe zhvillimit rural. Bashkë do të vazhdojmë edhe ne Buricë, Lipovicë, Bukovik, Capar e deri në Sllubicë e Kokaj”, ka thënë Haziri.
