AVDUSH CANAJ
Poeti është banor
i Planetit të Mrekullive
Kapelën e ka titull poezie
Syzet dritare ku rri buzëqeshja
Livadh ku rriten vargjet
këmisha e shkronjave
Nën jelekun e zambaktë
i fshihet lapsi magjik
Me copa resh pantallonat
e xhepat plot metafora
Si të yllit të mëngjesit
çorapet e larushta
Këpucët i lidhen vetë te shkallët
me rreze dielli
Kur të gjithë zogjtë flenë
del në shetitje për dore me hënën
te parku me rima
Poeti, ky banor
i Planetit të Mrekullive
