Riad Rashiti, kryetar i Degës së Partisë Demokratike të Kosovës (PDK), në Gjilan, ka thënë se përmes USAID-it amerikan në vitin 2023 komuna e Gjilanit ishte zgjedhur për të realizuar kontratën sociale, si pilot projekt për avancimin e planifikimit të buxhetit bashkë me banorët e këtyre tri fshatrave, për të siguruar transparencë dhe llogaridhënie.
Sipas tij, me ndihmën e USAID-it, u organizuan trajnime, dëgjime publike me banorët e këtyre fshatrave, u mbajt proces i votimit për përzgjedhjen e projekteve për investime, pastaj këto projekte u planifikuan në buxhetin e vitit 2024.
“Krejt në fund komuna e Gjilanit dështoi t’i realizojë të gjitha këto projekte. E ato projekte ishin: Në Bresalc dështoi ndërtimi i fushës sportit dhe këndi i lojërave për fëmijë, në vlerë prej 60,000.00 euro. Në Zhegër dështoi ndërtimi i terrenit sportiv në shkollën fillore Agim Ramadani, në vlerë prej 60,000.00 euro. Në Miresh dështoi rregullimi i fushës me bari sintetik në shkollën fillore Nazim Hikmet, në vlerë prej 20,000.00 euro”, ka thënë Rashiti i PDK-së.
Sipas tij, ky buxhet nuk u shfrytëzua për projektet e lartëcekura, por u shpenzua për tjera projekte që janë të paraqitur edhe në raportin financiar për vitin 2024.
“Ky kryetar komune nuk ka fije turpi, mashtron dhe gënjen, kurrë pa u ndalë dhe gjithçka i duket normale. Qytetarët e Gjilanit e kanë humbur besimin në këtë kryetar komune i cili i ka ditët e numëruara në qeverisjen komunale, sepse është i paaftë dhe i papunë për me kry projekte të rëndësishme për Gjilanin”, ka thënë në reagimin e tij, Riad Rashiti, i pari i PDK-së së Gjilanit.
