Shtatë martirët e Llovcës dhe mijëra të tjerë, u sakrifikuan për lirinë, pavarësinë dhe të drejtat e shqiptarëve. Ky është një përvjetor i dhimbjes, por në të njëjtën kohë edhe i krenarisë sepse falë gjakut të tyre, ne po e gëzojmë këtë ditë të bardhë.
Kanë kaluar 26 vjet dhe akoma kjo masakër makabre mbetet e pazbardhur. Por, megjithëse shumë i vonuar, është i mirëpritur lajmi i para disa muajve për arrestimin e pesë serbëve nga Prokuroria Speciale e Kosovës, përgjegjës për masakrën e Llovcës dhe vrasjen e civilëve Inatoc (Kokaj), Pogragjë dhe Uglar.
Prokuroria dhe policia e shtetit kishin realizuar këtë aksion për arrestimin e tyre, duke u bazuar në të dhënat e Komisionit Komunal të Gjilanit, i cili ishte themeluar pas luftës, duke qenë kujdestar në administrimin, faktimin dhe gjetjet e kohës.
Lavdi e përjetshme shtatë martirëve të Llovcës: Rahim Ymeri (arsimtar), Xhemail Halimi, Xhevrije Zeqiri, Nexhmije Azemi, Rabit Dalipi, Sami Xhelili dhe Avdi Rexhepi dhe të gjithë martirëve, dëshmorëve e heronjve të kombit!
Lutfi Haziri, kryetar i degës së LDK-së në Gjilan dhe deputet në Kuvendin e Kosovës
