Njëzet persona me aftësi të kufizuara kanë përfituar vende pune sot në bizneset vendore falë një projekti të Komunës së Gjilanit, e cila do t`i subvencionojë pagat e tyre për një periudhë prej një viti.
Kryetari i Komunës, Alban Hyseni ka thënë se këtyre punëtorëve, pos pagës, do t`u paguhen edhe kontributet pensionale.
“20 persona me aftësi të kufizuara do të angazhohen në bizneset lokale në periudhë kohore prej 1 viti dhe subvencionim mujor në shumë prej 300 euro nga komuna e Gjilanit, si dhe pagesë të kontributeve dhe pensioneve dhe mundësi të rritjes së pagës nga kompania që angazhohet”, ka thënë kryetari Hyseni.
Ai është shprehur i lumtur për këtë projekt, i cili u bë i mundur edhe falë gatishmërisë së bizneseve për t`iu përgjigjur pozitivisht thirrjes së Komunës.
“Tejet i lumtur që bizneset lokale iu përgjigjën thirrjes tonë për punësimin e personave me aftësi të kufizuara”.
Për më tepër, kryetari Hyseni ka realizuar edhe vizita në disa nga bizneset prodhuese/përpunuese në komunën e Gjilanit, të cilat kanë shprehur gatishmëri për punësimin e personave me aftësi të kufizuara, si “Bujana Produkt”, “Palma”, “RC Cola” dhe “Albimi”.
Kryetari Hyseni ka thënë se përmes punësimit dhe përvojës, këtyre personave u hapen dyert për mundësi të reja, integrim e pavarësi financiare.
Ai u ka bërë thirrje edhe bizneseve tjera që të bashkohen në këtë nismë, në mënyrë që të krijohen mundësi e kushte për përfshirje sa më të madhe në punësim të këtij komuniteti.
