Në kilometrin e 17 nga komuna e Dardanës, tani e 3 muaj po rregullohet rruga për fshatrat Rafunë, Huruglicë, Radec, Rukovc, Magurë, Firiqeve, Gmicë, Shahiq dhe Gjyrishec, e cila është e gjatë 7.8 KM. Ky investim ka gëzuar pa masë banorët e këtyre fshatrave, ku po u kthehet frymëmarrja e jetës. Në këto fshatra asnjëherë nuk ka pasur asnjë rrugë, dhe ndërtimi i kësaj rruge shënon një kthesë të madhe në përmirësimin e kushteve të jetesës së banorëve.
Ndërtimi i rrugës ka një rëndësi të madhe për banorët e këtyre fshatrave, të cilët për dekada kanë vuajtur nga mungesa e një infrastrukture të mirëfilltë. Rruga e re do të lehtësojë lëvizjen e banorëve, duke mundësuar një akses më të mirë në shërbimet bazike siç janë arsimi, shëndetësia dhe tregjet. Gjithashtu, kjo rrugë do të ndihmojë në zhvillimin ekonomik të zonës, duke u dhënë mundësi fermerëve dhe bizneseve lokale të transportojnë më lehtë produktet e tyre drejt tregjeve më të mëdha.
Në mesin e shumë fshatarëve që kanë kontribuar për realizimin e këtij projekti, duhen veçuar vëllezërit Sadri Halil Isufi dhe vëllai i tij Sejdi Halil Isufi, të cilët kanë dhënë tokat e tyre deri në 90 ari falas, vetëm që të rregullohet kjo rrugë. Plaku 83 vjeçar, Sejdi Halil Isufi, i entuziazmuar theksoi:
“Jam shumë i lumtur që për herë të parë në këto troje po ndërtohet më në fund një rrugë, e cila për banorët e kësaj rrethine është rruga e jetës. Unë me shumë dëshirë kam ndihmuar me aq sa kam mundur duke dhuruar 90 ari tokë për të realizuar këtë projekt, e cila do të jetë një rrugë që do t’u ndihmojë të gjithëve”.
Kadri Isufi, djali i Sadri Halil Isufit, gjithashtu ka dhuruar 90 ari tokë për rregullimin e kësaj rruge. Në lidhje me këtë, Kadri Isufi thekson:
“Kjo rrugë do të jetë shumë e rëndësishme për pasardhësit tanë, ku nga kjo rrugë do t’u hapen shtigjet e jetës. Pasi ky vend dhe këto toka kanë merituar edhe shumë kohë më parë që të rregullohet një rrugë”.
Një tjetër ndihmës i madh në këtë projekt ka qenë Hajdin Bislim Isufi, i cili ka dhënë rreth 70 ari tokë për ndërtimin e rrugës. Kontributi i tij ka qenë i madh për përfundimin e projektit dhe lehtësimin e lëvizjes për banorët e zonës.
Investitor i kësaj rruge është Komuna e Dardanës me një investim prej 1.5 milion eurosh. Ky investim ka ardhur si rezultat i një bashkëpunimi të ngushtë midis autoriteteve lokale dhe komunitetit të banorëve të zonës. Projekti është marrë përsipër nga K.N.P.SH. Papenburg dhe Adriani Company SHPK, të cilët kanë garantuar që rruga do të ndërtohet sipas standardeve më të larta të cilësisë. Asfaltimi i rrugës pritet të përfundojë në muajin nëntor të këtij viti.
Ndërtimi i kësaj rruge pritet të sjellë përfitime të mëdha afatgjata për banorët e këtyre fshatrave. Përveç lehtësimit të lëvizjes dhe përmirësimit të aksesit në shërbimet bazike, rruga e re do të nxisë zhvillimin ekonomik të zonës. Kjo do të krijojë mundësi të reja për punësim dhe rritje ekonomike, duke ndihmuar kështu në përmirësimin e mirëqenies së banorëve.
Rruga do të jetë një lidhje jetike për banorët, duke u mundësuar atyre të jenë më të lidhur me pjesët e tjera të komunës dhe të vendit.
Ndërtimi i rrugës për fshatrat Rafunë, Huruglicë, Radec, Rukovc, Magurë, Firiqeve, Gmicë, Shahiq dhe Gjyrishec është një projekt i madh dhe i rëndësishëm që do të ndryshojë jetën e banorëve të këtyre zonave. Me ndihmën dhe kontributin e banorëve të zonës dhe mbështetjen e komunës së Dardanës, ky projekt po bëhet realitet. Rruga e re jo vetëm që do të përmirësojë infrastrukturën e zonës, por do të sjellë edhe përfitime të mëdha ekonomike dhe sociale për banorët e saj.
