Dy vite më parë, kur Adil Maliqi mori drejtimin e Kombëtares U19 të Kosovës, shumëkush ishte skeptik për aftësitë e tij. Një figurë e panjohur në futbollin kosovar, Maliqi vinte nga Busavata e Kamenicës dhe kishte zhvilluar karrierën si futbollist në Zvicër. Megjithatë, një dëmtim i rëndë në këmbë e detyroi të braktiste futbollin aktiv.
Dashuria e tij për këtë sport nuk u zbeh, dhe pas largimit nga fusha, ai zgjodhi të ndjekë profesionin e trajnerit. Me punë dhe përkushtim, ai drejtoi disa klube zvicerane me sukses, duke fituar përvojë të vlefshme. Kur iu besua drejtimi i Kombëtares U19, Maliqi e pa këtë si një sfidë dhe motivim të madh për të dhënë më të mirën e tij.
Në fillimet e tij si trajner i të rinjve “dardanë,” Maliqi premtoi të sillte talente të reja në futbollin kosovar dhe të përballej me kombëtare të fuqishme ndërkombëtare. Këto deklarata fillimisht u panë me skepticizëm nga analistët dhe gazetarët sportivë. Por Maliqi, me punë të palodhshme, filloi t’i demantonte të gjithë duke arritur rezultate mbresëlënëse.
Një nga arritjet më spektakolare ishte fitorja kundër Kombëtares së Spanjës, tetë herë kampione evropiane. Përzgjedhësi Maliqi dhe lojtarët e tij e mposhtën këtë kombëtare të fortë, e cila në 40 ndeshjet e fundit nuk kishte pranuar katër gola. Pas kësaj humbjeje, Spanja u detyrua të reflektonte për një javë të tërë.
“Ndeshja kundër Spanjës ishte spektakolare dhe plot emocione. Kjo tregoi se nuk ka kombëtare në botë që nuk mund ta mposhtim, nëse kemi karakter, guxim dhe bindje,” u shpreh Maliqi pas ndeshjes.
Adil Maliqi njihet për qasjen e tij motivuese dhe për guximin për t’u përballur me skuadra të mëdha pa frikë. Ai ka krijuar harmoni dhe frymë të re brenda Kombëtares U19, duke treguar se me përkushtim dhe përgatitje profesionale, edhe kombëtaret më të forta botërore mund të vihen në vështirësi.
“Mua, Kombëtarja e Kosovës më duket e shenjtë, ashtu si dhe futbollistët që e përfaqësojnë atë. Jam krenar që kemi dëshmuar veten në ndeshje kundër skuadrave si Spanja, Austria, Ukraina, dhe Çekia,” tha Maliqi. Rezultatet e Maliqit e kanë ngritur në një nivel të ri futbollin e Kosovës, duke fituar respektin e kombëtareve botërore. Është e rëndësishme që Federata e Futbollit e Kosovës ta mbështesë në këtë rrugëtim të suksesshëm, duke i krijuar mundësi për të vazhduar të kontribuojë në zhvillimin e futbollit kosovar. Në përmbyllje, Adil Maliqi shpreh një falënderim të veçantë për gjithë stafin dhe ekipin me të cilin punon.
“Jam mirënjohës për të gjithë bashkëpunëtorët e mi që kanë qenë gjithmonë pranë meje, si në momentet e mira, ashtu edhe në ato të vështira. Pa punën dhe përkushtimin e tyre, këto suksese nuk do të ishin të mundura,” theksoi ai. Adil Maliqi, me punën dhe përkushtimin e tij, ka dëshmuar se është trajneri i duhur për të ndërtuar të ardhmen e futbollit në Kosovë.
