Njëri nga boksierët më të talentuar të pasluftës në Kosovë, Leotrim Rexhepi, është detyruar të tërhiqet nga boksi në moshën 25-vjeçare. Ky vendim i vështirë erdhi pas një dekade të përkushtimit të tij në këtë sport, ku fillimisht shkëlqeu në boksin amator, ndërsa në dy vitet e fundit garoi si profesionist.
Në boksin profesionist, Rexhepi zhvilloi shtatë ndeshje, duke arritur katër fitore, një barazim dhe dy humbje – një bilanc mbresëlënës për një sportist të ri dhe premtues. Megjithatë, mungesa e mbështetjes financiare e ka detyruar atë të marrë një vendim të hidhur.
“Ky ishte një vendim shumë i vështirë për mua, por nuk kisha zgjedhje tjetër,” thotë i zhgënjyer Rexhepi. “Kur fillova boksin profesionist, Kosova ende kishte regjim vizash dhe nuk mund të përfitoja nga ofertat për të boksuar në arenat evropiane. Pasi u hoqën vizat, sfidat u shtuan edhe më shumë, sepse duhej të siguroja fonde për udhëtime, akomodim, stërvitje dhe gjithçka tjetër që kërkon një karrierë profesioniste.”
Rexhepi, i cili gjithmonë e ka dashur boksin dhe kishte bërë tatuazh dorezat e boksit në trupin e tij si simbol i përkushtimit ndaj këtij sporti, ndjen keqardhje të madhe për këtë largim të detyruar.
“Kam investuar shumë nga vetja në këtë sport dhe nuk e kisha menduar kurrë që në kulmin e karrierës do të detyrohesha ta braktisja boksin për shkak të mungesës së financave. Shumë herë kam udhëtuar me paratë e mia në Itali dhe Spanjë, ndërsa disa afaristë nga Gjilani më kanë ndihmuar pa kushte dhe u jam mirënjohës pafund. Pa ta, nuk do të kisha mundur të zhvilloja asnjë meç,” shprehet ai.
Largimi i tij nga ringu është një tjetër dëshmi e problemeve të sportistëve në Kosovë, të cilët shpesh detyrohen të braktisin ëndrrat e tyre për shkak të mungesës së përkrahjes institucionale.
“Për momentin, jam shumë i trishtuar. Po ndahem nga dashuria më e madhe e jetës time, nga boksi, nga ringu dhe nga tifozët e mi të flaktë. Më duhet pak kohë për të menduar për hapat e ardhshëm,” thotë Rexhepi, duke lënë të hapur mundësinë për një rol tjetër në botën e sportit.
Në fund, ai ka falënderuar edhe gazetarët që kanë ndjekur karrierën e tij, duke theksuar rolin e tyre të rëndësishëm në promovimin e boksit dhe të sportit në përgjithësi.
Ky rast është një thirrje për institucionet lokale dhe qendrore që të reflektojnë mbi mungesën e mbështetjes për sportistët kosovarë. Ligji për sponsorizimin dhe përkrahja institucionale mbeten çështje të pazgjidhura, duke detyruar sportistët tanë të ndërpresin karrierën e tyre në kulmin e suksesit.
