Boksieri nga Gjilani, Leotrim Rexhepi, pati një përballje të fuqishme në Valencia të Spanjës me boksierin vendas, Sesus Carrasco. Në një duel prej gjashtë raundesh, Rexhepi dominoi ringun me aftësitë e tij, duke e vendosur Carrasco-n në vështirësi dhe duke fituar admirimin e shikuesve të pranishëm. Megjithatë, pas një paraqitjeje mbresëlënëse, gjyqtarët e ndeshjes befasuan të gjithë duke shpallur rezultatin të barabartë, një vendim që për shumë shikues ishte larg realitetit të asaj që u zhvillua në ring.
Gjatë gjithë raundeve, Rexhepi ishte i pandalshëm, duke treguar forcë dhe teknikë të lartë, ndërsa kundërshtari i tij spanjoll përpiqej të mbrohej. Në disa momente, Carrasco u pa në vështirësi serioze, por Rexhepi e ruajti përqendrimin deri në fund, duke treguar një përgatitje të shkëlqyer fizike dhe mentale. Për shumë prej të pranishmëve, fitorja e tij dukej e padiskutueshme. Mirëpo, vendimi i gjyqtarëve që e shpallën ndeshjen të barabartë shkaktoi një valë reagimesh negative nga publiku.
Pas përfundimit të ndeshjes, Rexhepi, i zhgënjyer por gjithashtu i vendosur, deklaroi:
“Kundërshtari ishte i fortë, por gjatë gjashtë raundeve isha dukshëm më i mirë. Fitorja ime ishte e qartë për të gjithë në sallë, dhe vendimi për barazim ishte një surprizë për të gjithë. Do të vazhdoj të punoj fort për t’u bërë edhe më i fortë. Falenderoj të gjithë ata që më mbështetën dhe stafin tim për përgatitjen e shkëlqyer.
” Ky vendim i diskutueshëm nuk e ndal Rexhepin që të synojë për fitore të reja në karrierën e tij. I mbështetur nga publiku dhe i frymëzuar nga përkushtimi i tij, Rexhepi është i gatshëm të kthehet edhe më i fortë për sfidat e ardhshme, duke e parë këtë përvojë si një nxitje për të vazhduar drejt majave të boksit.
